Ein Gwasanaethau
- Ymchwilio a Chofnodi
- Gwasanaethau Ymholiadau
- Ymgynghoriadau
- Cymuned
- Rhoi Cofnodion
- Menter Archaeoleg yr Uwchdiroedd
Ymchwilio a Chofnodi
Cangen Arolygu y Comisiwn Brenhinol sy’n gyfrifol am gofnodi ac ymchwilio er mwyn darparu gwybodaeth a dehongliadau awdurdodol o safleoedd, adeiladau a thirweddau archaeolegol a hanesyddol, gan ganolbwyntio’n arbennig ar elfennau na chynrychiolwyd ac na chydnabuwyd digon arnynt yn ein treftadaeth, neu ar elfennau sy’n enghreifftiau o bwys cenedlaethol neu ranbarthol o’u bath. Caiff ffrwyth ein gwaith ei ledaenu’n helaeth drwy amrywiaeth o gyfryngau, gan gynnwys y gronfa ddata ar-lein Coflein llyfrau a chyhoeddiadau, adroddiadau ymchwil ac arddangosfeydd.
Mae ein strategaeth arolygu yn cwmpasu amrywiaeth mawr o brosiectau. Yn eu plith, mae prosiectau thematig neu brosiectau ardal, a rhaglen strategol o ymgynghoriadau ynghylch safleoedd unigol ac adeiladau sydd mewn perygl oherwydd eu hesgeuluso, niwed i’w hamgylchedd, neu ddatblygiad.
Rhoddwn gyngor proffesiynol i eraill ynghylch arolygu a dehongli safleoedd, a’n nod yw gosod safonau drwy ein prosiectau eu hunain a chyhoeddi ein Lefelau Arolygu. Nod arall sydd gennym yw datblygu ac ehangu ymagweddau at gofnodi, deall a dehongli drwy barhau i ddatblygu technegau megis arolygu digidol, arolygu o’r awyr a samplu dendrocronolegol
Croesawn y cyfle i weithio mewn partneriaeth – er enghraifft, ag awdurdodau lleol, prifysgolion, cyrff cadwraeth a grwpiau gwirfoddol a chymunedol.